ВІЗУАЛІЗАЦЫЯ ВУЧЭБНАГА МАТЭРЫЯЛУ НА ЎРОКАХ БЕЛАРУСКАЙ МОВЫ
Інфарматызацыя грамадства спрыяла фарміраванню ў прадстаўнікоў малодшага пакалення новага тыпу мыслення. Так, дзеці, якія выраслі ў эпоху высокіх тэхналогій, па-іншаму глядзяць на свет. Іх успрыманне не паслядоўнае і не тэкставае. У адказ на выклік сучаснага інфармацыйнага свету патрабуюць актуалізацыі традыцыйныя адукацыйныя падыходы. Такім чынам, пры арганізацыі вучэбнага працэсу існуе неабходнасць візуалізацыі інфармацыі. Калі мы гаворым пра прыёмы візуалізацыі, то трэба, па-першае, размяжоўваць паняцці ”нагдяднасць“ і ”візуалізацыя“. На погляд нашага настаўніка, Рацьковай Ірыны Пятроўны, нагляднасць – гэта дэманстрацыя, а візуалізацыя – гэта калі вучні на аснове схемы, карты, малюнка супастаўляюць з’явы, факты, аналізуюць, шукаюць прычынна-выніковыя сувязі. У сувязі з гэтым настаўнік выкарыстоўвае на ўроках беларускай мовы прыёмы тэхналогіі крытычнага мыслення. Так, на занятках у 9 класе па тэмах ”Складаназалежныя сказы з даданымі ўступальнай і параўнальнай часткамі“, ”Складаназалежныя сказы з даданымі акалічнаснымі часткамі прычыны і мэты“ Ірына Пятроўна арганізавала працу вучняў з табліцай “Складаназалежныя сказы з даданымі ўступальнай і параўнальнай часткамі”. Дзелавая гульня “У рэдакцыі” спрыяла развіццю творчых, аналітычных уменняў вучняў. Адбылася праца трох аддзелаў: гісторыі і культуры, навін, літаратурны аддзел. Аб’ект даследаванняў супрацоўнікаў аддзела гісторыі і культуры – мінулае аграгарадка Машканы, аддзел навін – сучасныя Машканы, літаратурны аддзел – група, якая працавала творча. Кантроль ведаў праходзіў у форме задання “Сіта”, прадстаўленага ў выглядзе табліцы.
Другі ўрок пачаўся словамі Уладзіміра Караткевіча “Будзь удзячны за дабро, якое табе зрабілі, не жадай людзям таго, чаго не жадаеш сабе, будзь роўны з роўнымі, смелы з дужымі, паблажлівы да слабых, літасцівы да братоў нашых меншых. Інакш кажучы, будзь Чалавекам”, якія раскрылі выхаваўчы патэнцыял урока. Візуалізацыі матэрыялу спрыяла праца з табліцай з белымі плямамі, праца ў групах пры выкананні задання “Сінтаксічнае лато”, выкананне задання “Карэктар”.
Такім чынам, візуалізацыя дазваляе выпрацоўваць уменне аналізу і разумення тэксту, абагульнення аб’емнай інфармацыі.
